Como festa tradicional que é o Magosto no noso entorno non quixemos perder a oportunidade que nos brindan estes tipos de  encontros para reforzar os vínculos entre toda a comunidade educativa ( nenas e nenos, familias, persoal educativo e outros axentes do contorno),e a xulgar polas imaxes que vos mostramos a continuación pasamos un rato distendido e alegre, gozando da música e das relacións.

[kml_flashembed movie="http://www.youtube.com/v/UO1dNqThM3w" width="425" height="350" wmode="transparent" /]

A resposta, por parte das familias, foi unha vez máis moi comprometida co centro, aspecto do cal o equipo se sinte moi satisfeito e agradecido.

É destacable tamén a axuda recibida por outros axentes próximos á escola, da xuntanza anterior foi imprescindible a axuda do Centro Cívico, nesta ocasión a colaboración do instituto, cedendo o equipo de música e o soporte técnico, foi chave para o éxito da festa.

Xa estamos pensando no vindeiro encontro, á volta  estamos no Nadal!!!

Unha nova oportunidade de seguir tecendo fíos entre a nosa comunidade educadora.

Deixamos nesta entrada a montaxe proxectada na reunión que tivemos con motivo da elección dos representantes das familias, para todas aquelas persoas que non puideron asistir ou  para todas aquelas que queirades volver a vela.

A presentación ten como obxectivo facer un pequeno percorrido polo día a día da escola e trasladar a través das imaxes a importancia que a vida cotiá e o xogo ten  para o equipo educativo da escola no desenvolvemento saudable das nenas e dos nenos.

Os momentos de alimentación, hixiene e descanso, así como os momentos de acollida e recollida permítenos favorecer a autonomía, e son unha oportunidade perfecta para xerar unha autoestima positiva.

As situacións de aprendizaxe son numerosas e parten da propia experiencia, cando unha nena ou  neno recolle o seu prato no comedor está adquirindo nocións de equilibrio, de clasificación, de orientación, de orden, de socialización, de linguaxe, de competencia…

Cando unha nena ou neno xoga, ten a oportunidade de crear, de imaxinar, de imitar, de vivir outras experiencias, polo tanto unha nena e un neno que xoga é unha nena e un neno que aprende, desenvolve a súa linguaxe, a súa motricidade, as súas capacidades, pero sobre todo o xogo permítelles desenvolverse como persoas.

[kml_flashembed movie="http://www.youtube.com/v/NVbo0u_Rxdg" width="425" height="350" wmode="transparent" /]

Noutras xuntanzas, noutros encontros, noutras entradas iremos contándovos a nosa experiencia, a través da vida cotiá e o xogo, e poderedes ver como imos medrando, estades convidados a vivila connosco.