En primeiro lugar, as crianzas visualizaron distintas láminas de animais, esparcíndoas despois polo chan. 

A continuación, escoitamos os sons destes animais no aparato de música.

E por último, os/as nenos/as identificaron estes sons coas súas láminas correspondentes. 

Quedounos clarísimo que todos/as saben como fai a vaca, o can, o gato, o cabalo, a ovella, … demostrándonos tamén a súa agudeza auditiva.

Para experimentar que as froitas se poden comer de diferentes xeitos, decidimos que os/as nenos/as vivenciasen como se vai transformando un plátano dende que se pela ata que se pode comer en estado líquido. Os/as nenos/as disfrutaron moito nesta experiencia e mostráronse moi participativos.

O primeiro que fixemos foi manipular e observar o plátano, tamén o abrimos. Non é tan difícil como parece!!!.

Puxemos mans a obra para facer o batido, uns botamos o plátano, outros o leite e por último batémolo!!!.

Cando rematamos, enchemos os nosos vasos e que bo estaba!!!. Case todos repetimos.

Para finalizar a nosa experiencia decidimos pintar un plátano, así poderémolo colgar na habitación para lembrarnos do rico que estaba e pedir na casa que tamén nos fagan un batido.

Para que as crianzas coñecesen as sensacións que lles provocan diferentes texturas fixemos varios paneis empregando materiais da vida cotiá: lá, lixa, feltro, plástico de embalaxe e esponxa.

En primeiro lugar, as nenas e nenos tocaron coas súas mans experimentando así as distintas sensacións.

A continuación, tocoulle o turno aos pés. Tiñades que ver as súas caras: cando se afundían na esponxa, cando quedaban pegados no plástico, o suaviña que estaba a lá, …

Esta actividade estivo encaminada a que os nenos e nenas de 0-2 gozaran todo o posible tocando e manipulando diferentes materiais/productos ao tempo que, inconscientemente, aprendían moitas cousas (textura, cor, peso, …). Os materiais seleccionados foron fariña, area e “polispán” que depositamos en tres gavetas.

A continuación, as educadoras agochamos varios obxectos non moi grandes para que as crianzas os atopasen remexendo. A verdade é que lles gustou moitísimo e repetían continuamente: “Outra vez, outra vez”.

Nesta ocasión, os alumnos e alumnas da aula de 0-2 tiveron que traballar con imaxes, iso sí, moi próximas a eles/as para facer a actividade máis sinxela.

Nun primeiro momento, a educadora foi a encargada de irlles mostrando, unha a unha, as diferentes imaxes e explicando o que se vía en cada unha delas. 

A continuación, as crianzas convertéronse nas protagonistas tendo que atopar, cada unha delas, a imaxe que a educadora lles pedía en cada momento. É incrible o ben que o fixeron todos/as.

Por último, os nenos e nenas puideron observar e manipular libremente todas as imaxes. A verdade é que estiveron moi inxeniosos/as e graciosos/as nos comentarios que se dicían entre eles/as.

Nesta sesión do obradoiro dos sentidos as crianzas descubriron, nun primeiro momento, o son dos instrumentos. Para isto, a educadora foi mostrándollos un a un e contándolles como había que facer para que soaran.

           
A continuación, os nenos e nenas manipuláronos libremente facéndoos soar.

          
Por último, todos/as xuntos/as acompañamos a canción “Pi, pi, pi, pita o longo tren” cos diferentes instrumentos seguindo o mellor posible o compás da música.

Os tubos de papel hixiénico servíronnos esta vez para construir uns anteollos para descubrir un mundo de cores.

Pero as crianzas atoparon outro xeito de xogar co novo material. Fixérono rodar, metérono na boca, xogaron as espadas,…,en fin, deixamos que xogaran coa súa imaxinación. 

O mesmo pasou cando lle tocou o turno as follas de cores de papel transparente.

Na sesión de hoxe fixemos fincapé nos sabores das froitas que lles presentamos aos/ás nenos/as. Case todas coñecidas por eles/as: a mazá, o plátano, a ameixa, a pera e, para rematar, fixemos zume de laranxa.

Tivemos moita sorte de contar no obradoiro cun estupendísimo postre con peras feito, de xeito moi orixinal, pola nai de Xiana. 

O primerio que fixemos foi falar na asemblea do bo que é comer froita. Logo, mostramos láminas onde saían as súas imaxes. Tamén as tocaron e as uliron e, por último, deron boa conta delas. Aínda que algunhas froitas non tiveron o mesmo éxito, todos/as nenos/as quixeron probar parte delas.

Por certo, o zume debía de estar boísimo porque Xoán aproveitou ata o do espremedor.

Hoxe tiñamos unha sorpresa na aula: unha caixa vermella con debuxos! Maite e Patri contáronnos que na caixa había unha sorpresa: unha morea de cousas distintas para tocar. Que ben, gústanos moito descubrir novos materiais! Había cousas suaves, duras, rugosas,…