Arquivos mensuais: Outubro 2007

O MAGOSTO

untitled.bmp

O magosto é a festa de exaltación da castaña que leva asociados moitos elementos presentes en diversos ritos e tradicións da nosa zona. Enténdese como unha merenda-cea no mes de novembro nos días próximos ao día de defuntos ou polo San Martiño. Despois de xantar, a partir das tres, comézase a facer os preparativos. Iníciase a andaina camiño do monte, atopándose con outras familias ou grupos de amigos, búscase o lugar axeitado (descampado, encrucillada, longa laxe de pedra, onde o lume non poida facer mal), todos van cantando e disfrutando do día de outono. Búscase fruma, fentos secos, piñas ou palla para prender o lume. 

Acéndese o lume, inicialmente produce moito fume, pero logo a larada aumentará de volume e todos/as se achegan enfeitizados/as polo seu embruxo. Picaremos as castañas para que despois non rebenten no lume. 

Cando o lume se apague por si só, amorearemos as brasas, poñeremos unha parrilla e nela unha lata con buratos na que iremos colocando as castañas xa picadas. Mentres isto se vai facendo, os demais participantes preparan o sitio onde comelas e fan cucuruchos con papel para poder levalas. A festa non sería tal sen contar con xogos populares, bailar, contar contos, cantar,… 

Nós dende a escola faremos diversas actividades para festexar esta tradición:

  • Asamblea: falamos do Magosto (que saben os/as nenos/as da tradición, se probaron as castañas, elementos da festa,…)
  • Saída: ir coas crianzas a recoller castañas, ourizos, follas,… e observar a natureza nun lugar preto da escola.
  • Mural do castaño: pegamos nun debuxo dun castaño os materiais recollidos na saída.
  • Facer cucuruchos de papel de periódico e xogar a meter moitas e poucas castañas.
  • Establecer a diferenza entre froitos secos (castañas, noces, avelás,…) e froitos carnosos (laranxa, mazá, pera,…).
  • Conto “Historia dunha castaña”: escoitar o conto, escenificalo e facer un pictograma relacionado coa historia.
  •  Reproducir oralmente ditos, refráns, poesías e cancións relacionadas co Magosto: DITOS, RETAHÍLAS, REFRÁNS E CANCIÓNS.doc
  • Libro viaxeiro: receitas con castañas. Exemplos: RECETARIO.doc
  • Manualidades con castañas: facer colares, bonecos e diferentes animais (vermes, paxaros, xoaniñas, ourizos,…) con castañas.

 CA4LTUFE.jpgerizo.bmp boneco.bmp

  • Festa do Magosto: toda a comunidade educativa participaremos nela con xogos, contos, cancións e, por suposto, CASTAÑAS!!!!!

Obradoiros do Samaín en Baiona

O día 31  de outubro ás 17:00 da tarde na praza do Concello de Baiona todos/as os/as nenos/as da vila poderán participar neste obradoiro que organiza o departamento de Xuventude e Educación para celebrar o Samaín, tradición celta que se está a recuperar nestes últimos anos na sociedade galega.

“Obradoiro de coeducación e reparto de responsabilidades para pais e nais”

No Rosal, preto do noso Concello, os días 22, 24, 26, 29 e 31 de outubro terá lugar o “Obradoiro de coeducación e reparto de responsabilidades para pais e nais” de 19:00 a 21:00 horas e de carácter gratuito. 

O obxectivo deste obradoiro é potenciar o reparto igualitario de responsabilidades entre mulleres e homes e dar estratexias para a negociación coas crianzas. 

O acto está organizado polo Concello e patrocinado pola Consellería de Traballo e Benestar da Consellaría de Vicepresidencia.

O noso período de adaptación

A  entrada na escola infantil supón un importante cambio para o/a neno/a , e non soamente  eles teñen que adaptarse, senón tamén as familias. Dende o equipo educativo pretendemos facilitar este proceso mediante un plan de adaptación.

PLAN DE ADAPTACIÓN.pdf

Orlas no período de adaptación

Esta actividade a realizamos antes da entrada dos/as nenos/as na escola co fin de que as crianzas se coñezan e familiaricen entre elas e tamén co persoal do centro.

 P1010014.JPG   P1010013.JPG

IV Congreso Internacional de Educared

“Educar en comunidade” é o lema deste congreso, aos participantes do cal outorga tres créditos o Ministerio de Educación e Ciencia. Esta reunión, á que asistiron case 2000 docentes en 2005, contará coa achega de numerosos especialistas nacionais e estranxeiros que tratarán os temas de maior actualidade e interese, tanto no ámbito puramente pedagóxico como no da aplicación das tecnoloxías da información e a comunicación ao labor docente. O prazo para as inscripcións permanece aberto ata o 26 de outubro. 

 

Máis información: 

 

www.educared.net/congresoiv

Primeiro Congreso de Redes de Innovación Educativa

España acollerá o I Congreso de Redes de Innovación Educativa, que ten como obxectivo crear un foro onde todas as redes socioeducativas que se adican a este campo poidan poñer en común as súas prácticas e experiencias. 

Segundo informou o Secretario Xeral de Educación, Alejandro Tiana, o simposio promovido polo Foro pola Educación Pública, coa colaboración do Ministerio de Educación, parte do portal de Internet “INNOVA. Educadores en Red” (http://innova.usal.es/) e terá lugar os días 1, 2 e 3 de febreiro próximo sendo un mecanismo máis para que a aprendizaxe redunde nunha mellora da educación. 

Para participar no Congreso os participantes deberán inscribirse antes do 30 de novembro en dito portal e no propio Congreso.

Un portal de Internet permitirá descargar vídeos educativos de xeito gratuito

Un novo portal de Internet permitirá a calquera usuario, principalmente mestres/as e alumnos/as, descargar contidos audiovisuais educativos de forma gratuita a través da rede, co obxectivo de que as novas tecnoloxías sirvan de complemento para a ensinanza-aprendizaxe das materias.

Ver enlace: www.videoseducativos.es