Mañá abre o prazo de matrícula para o curso 2020/21 nas escolas infantís públicas autonómicas e nas prazas concertadas

  • Avánzase así na preparación do novo curso á espera de que o Goberno central fixe uns criterios claros sobre os prazos e condicións para a reapertura destes centros

  • A presentación das solicitudes realizarase preferentemente de maneira telemática a través da sede electrónica da Xunta

  • Será o primeiro curso completo no que se aplique a gratuidade para segundos fillos e sucesivos

  • En cada unha das sete principais cidades de Galicia, polo menos unha escola infantil pública autonómica ampliará o seu horario de apertura ata as oito da tarde

Santiago de Compostela, 14 de maio de 2020.- A Xunta de Galicia abrirá mañá, 15 de maio, e ata o vindeiro día 29 de maio, ambos incluídos, o prazo de inscrición para o curso 2020/21 nas escolas infantís públicas autonómicas e nas prazas públicas concertadas en escolas infantís de iniciativa privada.

O Diario Oficial de Galicia (DOG) publicará mañá as resolucións que rexen o procedemento para a solicitude e adxudicación destas prazas. Deste xeito, a Xunta procura diminuír a inquedanza das familias sobre o vindeiro curso nas escolas de 0 a 3 anos, á espera de que o Goberno central fixe uns criterios claros sobre os prazos e condicións para a reapertura destes centros.

A presentación das solicitudes realizarase preferentemente de maneira telemática a través dos formularios dispoñibles na sede electrónica da Xunta de Galicia. Con esta medida, trátase de evitar que as familias se teñan que desprazar nesta situación de emerxencia sanitaria.

Novidades

No vindeiro curso haberá dúas grandes novidades. En primeiro lugar, este será o primeiro curso completo no que se aplique a gratuidade para segundos fillos e sucesivos na atención educativa. En segundo lugar, en cada unha das sete principais cidades de Galicia polo menos unha escola infantil pública autonómica ampliará o seu horario de apertura ata as oito da tarde, co fin de mellorar a conciliación das familias.

Cómpre indicar que as prazas públicas da rede autonómica e as contratadas en escolas privadas compleméntanse coas prazas que a Xunta financia en escolas de iniciativa social e a través do Bono Concilia, así como coas que dependen dos concellos.

Total Page Visits: 82 - Today Page Visits: 5