A Xunta porá á disposición das familias galegas 22.500 prazas públicas de escolas infantís no próximo curso

[22/05/2017] O presidente da Xunta, Alberto Núñez Feijóo, destacou hoxe que as familias galegas contarán no vindeiro curso con 22.500 prazas públicas de escolas infantís, co compromiso -reiterou-, de lista de agarda cero. Durante unha visita ao centro interxeracional da Fundación Amancio Ortega en Arteixo (FAO), Feijóo lembrou ademais que a Xunta seguirá poñendo á disposición dos fogares galegos o Bono Concilia para asegurar unha praza concertada ás familias que non logren acceder a unha nunha escola pública.

EI-CD ARTEIXO

 

O titular do Goberno galego referiuse ao centro interxeracional de Arteixo como exemplo da importancia do traballo conxunto entre o sector público e o privado, na aposta polo benestar da sociedade. E, nesta liña, salientou que as 82 prazas da escola infantil, as 40 do centro de día e as 64 da residencia, contribuirán a facer dese concello un lugar mellor para vivir e para conciliar.

O centro, que comezará a funcionar no último cuadrimestre deste ano, súmase ás escolas infantís que, en colaboración coa Fundación Amancio Ortega (FAO), xa se puxeron en marcha en Ferrol, Melide, Cambre e A Coruña. Ao que hai que engadir os proxectos que xa están en distintas fases de desenvolvemento, como o centro interxeracional de Ourense e as escolas infantís para Santiago, Lugo e Vigo.

Feijóo concluíu incidindo na traxectoria da FAO, que contribúe a que Galicia sexa hoxe máis solidaria, con 20.660 prazas máis que en 2009 de centros de día, de residencias para maiores, para persoas con discapacidade, ou de escolas infantís.

Total Page Visits: 374 - Today Page Visits: 1