Arquivo da categoría: Sen categorizar

“Hacer de padres y madres 24 horas al día” con Vicenç Arnáiz

Achegamos unha nova píldora de Vicenç  Arnáiz titulada: ” Hacer de padres y madres 24h al día “.  Nesta ocasión Vicenç reflexiona sobre os beneficios da contínua colaboración e retroalimentación  familia- escola, nun proceso  constante de intercambio e aprendizaxe conxunto. Durante este período de confinamento as nais e pais estades  a facer  un gran esforzo para organizar o día a día  dos pequenos e pequenas,  e estades amosando unha gran creatividade, forza e solidaridade. Moitas grazas familias!!

Agradecer tamén aos e ás profesionais que estades ao carón dos nenos e nenas e das familias aportando as vosas propostas, reflexións e apoio afectivo !!

A caixa da calma

 Proposta da Escola Infantil  Boiro Praia Xardín

Nome: A  caixa da calma

Idade: 2-3 anos

Obxectivos:

-Promover a xestión das emocións e aumentar o benestar das crianzas

-Desenvolver a creatividade

Materiais:

  • Unha caixa

  • Calquera tipo de material do que dispoñamos para decorala: pinturas, ceras, papeis, pegatinas…

  • Obxectos cunha significatividade para as crianzas (conto, boneco, coxín…)

  • Un caderno ou folios soltos

  • Frasco de plástico ou cristal

  • Xabón líquido transparente

  • Purpurina

  • Calquera tipo de obxecto pequeno para meter dentro do frasco: estreliñas, cunchas…

Descrición da actividade: Eliximos unha caixa que decoraremos ao gusto coas nosas nenas e nenos e metemos nela obxectos especiais que teñan o poder de axudar a calmar e relaxar. Cada caixa da calma é diferente e os obxectos poden variar, pero o seu uso e obxectivo son similares.

A que expoñemos aquí contén:

  • un osiño de peluche (obxecto agradable para soster nas mans)

  • un conto (que posúa unha significatividade para a nena ou neno). Pode versar sobre as emocións e así axudaralles a identificar o que están a sentir.

  • un bote da calma*

  • unhas pelotas sonoras (que para que soen ben hai que movelas amodo, o que invita a pausar e controlar o movemento do corpo e ademais producen un son relaxante).Tamén podemos utilizar un pau de chuvia, cunco tibetano, instrumento musical relaxante.. .

  • un caderno e pinturas (para expresar graficamente as emocións que están a sentir).

    Como a usamos?

    Cando vexamos que as emocións superan ás nosas nenas e nenos será o momento de utilizala. Ao principio haberá que orientalas e acompañalas a que a usen, axudándoas a verbalizar as emocións que están a sentir. Pouco a pouco irá collendo autonomía e aprenderá a xestionarse sabendo cando necesitará a caixa. Por suposto, a caixa está en constante evolución, sempre se poden engadir novos elementos.

Xoguetes para o baño

Sabemos que o momento do baño resulta moi pracenteiro para a maioría dos nenos, e que se temos algún xoguete a man, aínda o disfrutan máis. Dende a Escola Infantil de Pantón  envíannos esta proposta para facer uns sinxelos xoguetes flotantes.

– Nome da actividade: Xogamos na bañeira

Idade: Calquera  idade

– Obxectivos:

– Elaborar xoguetes flotantes con materiais de refugallo.

– Observar a flotación dos obxectos.

– Disfrutar do momento do baño.

– Descrición: Necesitaremos os seguintes materiais: 3 tapóns de cortizas; tapadeiras de botes; goma elástica; escarvadentes; pistola de cola quente; cartolina; cartón ou papel de cores; rotuladores, botella de plástico.

A elaboración é moi sinxela:

1º xoguete: Cortamos un anaco de cartón de forma triangular e pintámolo de cores, para facer a vela do noso barquiño, e pegámola ao escarvadentes. Logo unimos os 3 tapóns de cortizas cunha goma elástica e clavamos no tapón do medio o escarvadentes. E xa temos un barquiño feito!!!

2º xoguete: Cortamos outro anaco de cartón de forma triangular e pegámolo nun escarvadentes. Despois pegámolo na tapadeira cun puntiño de cola quente, e xa temos outro barquiño!

3º xoguete: o mesmo proceso anterior pero utilizando o cú dunha botella de plástico!!!

Tamén podedes utilizar palliñas ou tapóns de botellas de leite!!!!

Os sons da culler

Dende a Escola Infantil de Santiago Tambre amósanos esta experiencia cos sons

Nome: Os sons da culler

Idade: de 1 a 3 anos.

Obxectivo:
Estimular o sentido do oído.
Potenciar a creatividade e a imaxinación.
Manipular de obxectos e descubrir diferentes utilidades dos mesmos.
Desenvolver habilidades manuais.

Materiais:
Culleres de distintos tamaños, unha tixola, unha pota, un relador, unha lata de metal, un tapón de cortiza, unha goma, unha percha, un aro e cordel.

Desenvolvemento:
1ª : Poñemos a culler, a tixola, a pota, o relador e a lata ao alcance do neno para que este vaia libremente, o seu xeito, tocando ca culler nos distintos materiais e descubrindo os sons que emiten.

 

 

 

 

2ª: Collemos dúas culleres e xuntámolas pola parte mais estreita colocando un tapón de cortiza entre as dúas e suxeitándoas cunha goma elástica, así facemos unha especie de castañolas.

3ª : Necesitamos culleres de distintos tamaños, unha percha ou un aro e cordel. A un extremo do cordel atamos as culleres pola parte mais estreita e o outro extremo atámolo á percha ou ao aro.

Se facemos o aro poñémoslle un cordel nos lados opostos e xa os podemos colgar para que soen.

Xogos para bebés

Dende a escola infantil de Meira, queremos compartir unhas cancións a modo de xogo para os nosos pequenos de 6 – 12 meses.

Os obxetivos que temos en conta para a realización desta actividade son:

  • Traballar a psicomotricidade grosa.
  • Axudar a entender o espazo que no que se desenvolve.
  • Favorecer a atención da crianza a través da música.
  • Despertar o sentido do oído a través das cancións.
  • Axudar a formar un vínculo de apego ca persoa que realiza a actividade.

Para levar a cabo esta actividade só precisamos dun espazo tranquilo, a nosa voz, o noso bebé e os nosos abrazos.

 

 

 

 

 

Animádevos a facelo. A o voso pequeno vaille encantar.


Anexo video explicativo.

Un xoguete de refugallo

 Dende a Escola Infantil de Pontevedra Campus, amósannos unha proposta para confeccionar un xoguete con material de refugallo. “Reutilizar é importante xa que produciremos menos lixo e gastaremos menos recursos”

Nome: Xogo de ensartar

Materiais:

  • Aproximadamente un metro de cordel ou cordiña que teñamos pola casa podémos empregar un cordón dunha zapatilla de deporte do adulto.
  • Tubos de cartón poden ser de papel hixiénico ou de rolo de cociña.
  • Pinturas e adhesivos (opcional).
  • caixas de zapatos

Idades: (1-3 anos)

Os nenos e nenas máis pequenos necesitarán un pouco máis de axuda na elaboración do xoguete dependendo do seu desenvolvemento na motricidade fina.

Obxectivos:

  • Pasar un bo rato en familia elaborando os nosos propios xoguetes.
  • Concienciar sobre a importancia da reutilización de materias.
  • Fomentar a creatividade.
  • Favorecer a coordinación óculo-manual .
  • Promover a motricidade fina e as nocións lóxico-matemáticas.

Descrición:

Comezamos pintando coas mans ( nenos/as de 1-2 anos) ou con pinceis (nenos e nenas de 2-3 anos), os tubos de papel de diferentes cores. Deixarémolos secar e cortaremos en 2 anacos os de papel hixiénico e en 4 os de rolo de cociña, logo decorarémolos con adhesivos.

Coa axuda do adulto colocaremos nun extremo da corda un tope para que non caian os tubos de papel, podendo ser un rolo atravesado ou un anaco de cartón.

No outro extremo para os pequenos e pequenas que non teñan adquirida a “pinza” podemos engadir un pao para que sexa máis doado o agarre.

A estas idades aos nenos e nenas encántalles ensartar unhas pezas en outras, adquiren así as primeiras nocións lóxico-matemáticas creando colares, serpes, …

 

Buratos nunha caixa

A Escola Infantil de Carral fainos unha proposta onde as nenas e os nenos gozarán manipulando e descubrindo que é o que lle pasa á caixiña.

Nome: Buratos nunha caixa

Idade á que vai dirixida: 1-2

Obxetivos:

  • Promover a motricidade fina e a coordinación manual.
  • Potenciar a atención e gusto polo descubrimento.

Materiais: unha caixa de cartón

Desenvolvemento:

Dependendo do tamaño dos obxectos cos que se vaia a xogar faranse varios buracos á caixa, realizando un mais grande para que poidan coller aqueles que se vaian metendo. Pódense utilizar pelotas que xa temos ou facelas de papel, tamén poden servir laranxas, mandarinas ou calquera cousa que se vos ocorra. O importante é pasalo ben.

BENVIDA

Ola a todas e a todos

Queremos trasladarvos a nosa benvida a toda a comunidade educativa a este blog no que atoparedes recursos, ideas, experiencias e reflexións co obxecto de axudarvos a levar mellor estes días na casa coas vosas pequenas e pequenos e coas vosas familias.

Antes de nada, dar as grazas por toda a vosa implicación e participación activa no día a día, que permite a construción dunha escola pensada por e para as nenas e nenos.

O noso obxectivo é acompañarvos e compartir experiencias, xogando xuntos, aprendendo a facer escola e educando en valores.

Contra o illamento nas nosas casas, tendamos pontes a través deste espazo. As distintas entradas e artigos irán dirixidas ás nenas e aos nenos, ás familias, así como ao conxunto do persoal das escolas a través de tres categorías diferentes: (*ver nota abaixo)

  1. Recursos para as nenas e os nenos
  2. Acompañamento ás familias
  3. Compartindo estratexias cos equipos

Agardamos que sexa do voso agrado, seguimos entre todos facendo escola.

Moitísimas gracias e moito ánimo e saúde.

NOTA *(As pestanas coas tres categorias mencionadas, atoparédelas á dereita do blog, e teredes tamén unha entrada ao canal de youtube creado especialmente para este blog de “A Escola Infantil na casa”)

Día Mundial da Concienciación sobre o Autismo

No día de hoxe no que se conmemora o Día Mundial da Concienciación sobre o Autismo, queremos aproveitar a oportunidade que nos brinda esta ventaniña do blog para en conxunto trasladar unha mensaxe de positividade, visibilidade, sensibilización e concienciación social sobre as nenas e nenos con autismo e as súas familias.

No libro “El niño pequeño con autismo” unha familia compartía: “comecei a sentir que alguén me cortara o fío telefónico que antes me comunicaba co meu fillo, chamaba unha e outra vez pero era como se non tivera liña”. “Parece non inmutarse ante un ruído estrondoso, nin se xira a mirar, nin dirixe a súa mirada cara a el”.

Aínda que en ocasións sintamos que algo se nos escapa, e por máis que tiremos do fío pensemos que o fio está roto… isto non é así, hai moitos “fíos” que están aí dos que podemos seguir tirando: o fío do acompañamento, da comprensión, da busca de estar co outro, do entendemento, do respecto, da equidade,…

Non esquecemos que este é un día sinalado pero que todos os días son días para o respecto e a atención de toda diversidade.
O noso recoñecemento para todas e todos os que tirades deste fío.

Neste eido, vos achegamos enlace a unha breve e emotiva curtametraxe, nomeadaMi hermanito de la luna”.