Ola familias!!!

Aquí estamos os amiguiños/as do Nivel II para mostrarvos o ben que o pasamos na escola unha vez superado o periodo de adaptación.

Facemos exercicio:

Xogamos con papeis de diferentes texturas:

Manipulamos alimentos variados: lentellas, pasta…

Contamos contos:

E disfrutamos moito do xardín!

Ata outra familias!

O venres 14 de outubro tivemos na Canteira unha gran sorpresa:

Veunos visitar o rato Riki, cargadiño de agasallos para todas as aulas. Troúxonos o conto que lle da o nome a cada aula e tamén os paneis que colocamos nas portas das aulas para identificarnos. Ah! esquecíamonos de contarvos que na súa maleta viñan agochados todas as personaxes dos contos:

A sala 1 é O polo Pepe:

A sala 2 é A porca Clea:

A aula 3, son os ratiños do conto Queres xogar comigo?

A aula 4 é O coelliño branco:

A sala 5 é A eiruga larpeira:

A sala 6 é A xoaniña rosmona:

E a sala 7 é A cebra Camila:

Esperamos con impaciencia a próxima visita do noso ratiño Riki…

Boas tardes!

Estes días temos unha novidade na escola; estamos a colaborar nunha campaña de recollida de alimentos para a asociación Equus Zebra.

Esta ONG da Coruña conta con varios proxectos de formación, sensibilización, orientación laboral, atención psicolóxica, asesoramento xurídico,… dirixidos a aqueles colectivos que por estar en situación de exclusión social máis o necesitan.

Os alimentos que se están a recoller van ir destinados ó economato social que dende o ano 2008 esta asociación puxo a funcionar para axudar a familias con dificultades socioeconómicas.

Esperamos que colaboredes todos na medida do posible; a cambio da vosa aportación podedes levar as tres receitas internacionais que vos ofrecemos no mostrador na entrada. Foron feitas con todo o noso cariño. Coleccionádeas , seguro que vos encantan.

Ah, decir que levamos un bo ritmo, que non decaia! Grazas por todo.

Ola, somos os bebés do nivel I, aínda que xa non somos tan pequenos e gústanos coñecer novos espazos da escola.

Estes días estamos saíndo ó corredor e encántanos, vemos a amigos doutras clases e xogamos con moitas cousas…

…co cestiño dos tesouros

…con pelotas

…con bolsiñas de tela

….con botellas de cores

….con instrumentos musicais

Ata outro día, nós seguimos ó noso, experimentando con todo que é o que máis nos gusta.

Xa estamos de novo aquí, outro ano máis! Algúns reencontrándonos cos compis e as profes e outros facendo novos amigos; ímonos afacendo todos a novos espazos, novas rutinas…

A adaptación é o que máis nos custa a todos (nenos e nenas, familias e tamén profes), pero pouco a pouco comezamos a integrarnos. Cada día vainos custando un pouco menos e a escola xa nos gusta moito máis.

Esperamos que este curso sexa de proveito para todos, aprendamos moitas cousas e descubramos un pouco máis do que nos rodea.

Para dar por rematado este curso 2010/11 fixemos unha gran festa na escola. Tivemos obradoiros de globoflexia, de pompas, de modelaxe con area e auga e paracaídas. E despois de tanto xogar había que merendar. As familias trouxeron cousas riquísimas. Puxémonos as botas, os nenos, as familias e tamén o persoal da escola!

A demais de colofón deste curso ,que esperamos fora de proveito para todos, esta festa foi para agradecer ás familias a colaboración e participación da vida da escola.

Aquí vos deixamos a nosa reportaxe fotográfica deste evento.

Comezando novo centro de interese queremos amosarvos todo o que traballamos nestes meses pasados, festexando o Entroido…

Todos e todas, na escola, aproveitamos este centro de interese para seguir avanzando en autonomías(vestirse e espirse, lavar as mans e a cara, sacar e pór zapatos…), coñecer un pouco máis o noso corpo e as posibilidades que nos ofrece (pintando a cara, as uñas, probando gorros e perrucas, xogando con capas e disfraces…), e  coñecer unha festa tan importante como é o Entroido para a nosa cultura.

Agradecervos a colaboración das familias achegándose á escola para os obradoiros de disfraces, traendo merenda para a festa e participando cos nenos e nenas na vida da escola, en especial a Carlos Lage, o pai de Martín pola gran interpretación de Zacarías para a festa que celebramos o día 4 de marzo.

Aquí vos deixamos a nosa reportaxe gráfica:

Ano novo, centro de interese novo! Ó comezo deste ano traballamos o corpo adaptándoo a cada idade. Aquí tedes unha pequena mostra.

Os máis pequechos, os bebés, comezamos a introducir na nosa rutina as actividades de manipulación e experimentación de substancias con texturas, cores e sabores diferentes. Utilizamos remolacha coa súa cor tan vistosa, fariña de arroz con auga e colorante alimenticio, cenoria relada… Non nos esquecemos, por suposto, o cestiño dos tesouros que nos proporciona tamén texturas, olores…Tamén nos puxemos mans á obra coa motricidade para pronto andar e gatear sen parar.

No nivel II descubrimos novas sensacións coa interacción do corpo con diferentes obxectos: plumas, algodón… e comezamos a traballar o noso esquema corporal ,por exemplo, pintando as nosas siluetas, pintando os beizos…

Tamén os máis grandiños (nivel III) traballamos o esquema corporal, por exemplo, xogando a vestirnos e espirnos, con zapatos de diferentes tamaños (tamén traballamos a autonomía, claro), cancións sobre diferentes partes do corpo… Ademais exploramos as nosas posibilidades e as nosas limitacións con circuítos de motricidade grosa e fina.